Gwarchodfa Natur Parc Slip

Mae’r warchodfa natur 300 erw a chanolfan ymwelwyr yr Ymddiriedolaeth Natur yn cynnig rhywbeth at ddant pawb!

Mae’r warchodfa yn gartref i dros 1,000 o rywogaethau bywyd gwyllt anhygoel a rhai o blanhigion prinnaf Cymru. Mae’r rhywogaethau hynny’n amrywio o’r fadfall ddŵr gribog sydd mewn perygl o ddiflannu ac sy’n bridio yn y pyllau a’r llynnoedd, i’r llygod medi swil a’r cornchwiglod carismatig sydd i’w gweld yn y dolydd blodau gwyllt. Mae’r dolydd hynny hefyd yn llawn tegeirianau, carpiog y gors a blodau menyn. Does dim rheswm pam na allwch fynd yn WYLLT yma!

At hynny mae gan y warchodfa amrywiaeth o gynefinoedd i’w harchwilio a thros 10 cilomedr o lwybrau cerdded. Mae’r rheini yn cynnwys ein 4 llwybr cerdded GWYLLT newydd i’r teulu a llwybrau beicio didraffig sy’n cynnwys 4 cilomedr o Lwybr Beicio Cenedlaethol Rhif 4 Sustrans! Mae gennym hefyd gaffi sydd ag ardal eistedd yn yr awyr agored, cysgodfan â tho gwyrdd i feiciau a man gwefru ceir trydan.

Mae ein caffi wrthi’n datblygu ei arlwy, felly dewch draw i flasu cawl cartref blasus. Mae hefyd yn cynnig llawer o ddewisiadau i lysieuwyr a feganiaid yn ogystal â phrydau bwyd mwy traddodiadol sy’n cynnwys cig. A bydd cacen ar gael bob amser, wrth gwrs!

Mae’r ganolfan ymwelwyr ar agor o 10am tan 4pm o ddydd Mawrth i ddydd Sul ac mae’n hygyrch i bawb. Gallwch barcio am ddim hefyd!